"Al Condominni" poesia brillante in dialetto parmigiano di Bruno Pedraneschi,letta da Enrico Maletti

Estratto di un minuto del doppiaggio in dialetto parmigiano, realizzato nell'estate del 1996, tratto dal film "Ombre rosse" (1939) di John Ford. La voce di Ringo (John Wayne) è di Enrico Maletti


PARMAINDIALETTO Tv


Tgnèmmos vìsst
Al salùt pramzàn äd parmaindialetto.blogspot.com

“Parmaindialetto” è nato il 31 luglio del 2004. Quest’anno compie 16 anni

“Parmaindialetto” l’é nasù al 31 lùjj dal 2004. St’an’ al compìssa 16 an’

Per comunicare con "Parmaindialetto" e-mail parmaindialetto@gmail.com

L’ UNICA SEDE DI “Parmaindialetto” SI TROVA A PARMA ED E' STATO IDEATO DALLA FAMIGLIA MALETTI DI “PÄRMA”.







lunedì 18 maggio 2009

Il pagéli stagionäli di Crozè in djalètt Pramzàn campjonät 2008/2009 seria B. Testo pubblicato sulla Gazzetta di Parma del 18 maggio 2009





(Fransèssch Guidolin, Alberto Paloschi e al Pubblich 10 a tùtt tri, i pu bón di Crozè in camp p’r al campjonät 2008/2009.)

Pärma F.C. promos in seria A

Pavarén òt: stagión da yoyò, andäda da sgrizór, un ritóron pù che discrét Torero Camomillo, a pära ch’ a t’àbi soportè al mäl äd schén’na tùtt al girón d’andäda in silénsi sénsa sarcär scùzi, insòmma ‘na parsón’na par bén e un bón profesjonìssta !

Pegolo sèt: ‘na partìda o do a né ’m ricòrd gnànca, a Vicénsa sicur, ‘na béla prestasjón e tùtt al rest äd stagjón tra infermarìa e banchén’na

Antonéli òt : pochi pochi partìdi, suficénti però p’r ésor godù da tùtt, ‘na sicurèssa in banchén’na, miga un lavór da tùtt

Castlén òt : Pavlén, s a t’ ho da dir la vritè i dù ch’ a’t gòda äd pù a Pärma a sämma mi e Paolo Grossi, d’ätra pärta à sämma anca i dù ch’ a n ’in capìssa äd pù äd balón dónca a ’t pól stär sicur, e adésa, tajär chi cavjì lì ch’ a sämma tornè in A se Dio vól

Falcón sénsa vót : stagión tribuläda, prima Cagni, dòpa jli infortùni, insòmma tùtt stort, girämma pagina ala zveltén’na

Lucaréli picén òt : gran zugadór, pilàstor, caràtor, pè bón, parsonalitè, cuand l’é manchè lì in méza i balävon cme a l’escaliér ! A ’t conférmi mi, par st’an’ ch’ vén, pasa dal Ghìro a firmär al contrat ch’ l’é béle pront

Paci sèt: ält e bas, par fortón’na pù j’ält che i bas, ch’ l’embolo lì ch’ a partìssa un po’ tròp de spèss, ‘na cuälca partìda un po’ acsì, mo tùtt somè ‘na stagión pozitìva, specialmént con Lucaréli atàca

Rossi sìncov: l’é un vót par zveljär’t un po’ parchè a té ’t zi drè a indormintär un po’ tròp, e ala tò etè la ’n va miga bén ! Forsa pramzàn

Troest (Tost) sèt: un sèt ch’ a pól dvintär un òt o un nóv s ’at starè chi a Pärma e mi a spér äd si, e anca il ragàzi äd Pärma a ’s dìz in gir

Zenón nóv: Dino secónd mi la pù béla sorpréza äd l’an’, tùtt n’ätor zugadór da l’an’ pasè ! T’arè zbaljè ‘na partìda si e no, ‘na sicurèssa ! Vojätor ädla gazètta ch’ a conosì tùtt, provì a recuperär Dino l’originäl e al portì a Colècc’ e gh’ fì fär ‘na béla foto insèmma dai

Bùdel séz: DePiscopo al s’éra ispirè a tì cuand l’ha scrìtt andamento lento, dil volti pròprja da impajäros, però dù gol fondamentäl e n’ezultansa da nàdor

Lunardén òt: sénsa strafär al s’é ricavè al so spasi subìt, e cuand l’ha zughè l’ha sèmpor fat la so pärta con umiltè, un ragas séri che a Pärma al sarà sémpor rispetè

Manzón sèt: un gol pezantìssim a Frozinón e sfortón’na pauróza, al prémi Swarowasky 2009 l’é to a n’ gh’ é dùbbi

Mariga nóv: esplóz äd prepoténsa, con tùtt il cualitè da gran zugadór ! Corsa, poténsa, cativérja, técnica e maruga……pù maruga par mariga in pochi paròli

Morón òt : déz par vlontè e atacamént, séz cme rendimént s’ t’an, giron d’andäda orénd ritóron molt méj, ‘na fàsa da capitàn ereditäda e sémpor onoräda, e i tò lägormón dal dezdòt äd màg’ adésa i s’én trasformè in lägormón äd contintèssa, ezatamént cme i nòstor !

Leòn séz : géni e sregolatèssa ! A dir la vritè pù sregolè che geniäl ma la prestasjòn col Pisa la väl cuäzi ‘na stagión da lè ! T’è catè finalmént il ciävi par révor al luchètt ädla porta ädla serie A

Lucaréli grand sèt : Cristiàn, par còl ch’ a t’è fat in camp al séz l’é stirasè, p’r il sclerädi anca, invéci tè ’m si piazù bombén cme portamént in-t-al finäl a där ‘na man al Mìsster, fondamentäl dabón al vót l’é par col lì ! E po’, al gol col Pisa…….secónd mi t’arìss paghè äd tò sacòsa si ’t l’avìsson dit ch’ a t’al fäv acsì

Paloschi déz : la pù béla sorpréza äd l’an’, un ragasén strepitóz, in camp e fóra ! A gh’ vrìss pròprja ‘na ramäda par tì e sta sicur che témp do partìdi a ’t la tirarìss zò cme Barbuti! Gràsja e resta chi ch’ a ’t stè da Dio !

Pisanu séz : al témp äd fär dù gol, e la solita Via Crucis ! ‘Na bendisjón Andrea ?

Vantagè séz : Bulgaro, colp da fuoriclàsa, ma rendimént apén’na suficént par col ch’ a ’t zi costè, ma la tò categoria la sarà la serie A, dòpa al taljànd ai znòc’

Cagni zéro : lasèmma pärdor

Guidolin déz : Don, t’è capì tùtt fin dal prinsìppi, a gh’è coj ch’ a dìz ch’ a né ’t rid mäj, ch’ a ne ’t zi miga spiritóz, dagh’ gnànca a menta, sa vòj rìddor a guärd Zelig, ti t’é fat al tò mestér da gran profesjonìssta, e primma äd tùtt t’è capì i pramzàn al vól ! Mì spér che col matrimònni chì al pòsa durär al pù posìbbil, e cme mi tùtta la génta äd Pärma ! Gràsja Mìsster, gràsja äd cór !

Ghirärdi òt : vèddot Ghìro che cuand a n’é ora al bél vot al riva? Basta meritärol; anca tì da cuand a gh’é al Don a ’t zi madurì äd colp, adésa t’al sè col ch’ a vrämma tùtt a Pärma, e ’t vedrè che la génta la ’t vrà ancòrra pù bén ! Avanti Ghìro!

Tifóz déz : un bél bagn d’umiltè anca par nojätor, e dzämma ch’ a ’s sämma divartì parèc’, pù bél in trasfèrta che in cà, con la colón’na sonora d’ Antonio Benassi, béj cme ‘l sól! Pärma l’ha rispost cme sémpor, a testa altìsima e adésa väla par tùtt, zò il man dal Tardini, stì ala lärga dal monumént, capì ?

(Tgèmmos vìsst)
(Pramzàn dal sas)
(Testi di Crociato 63 supervisione ortografica di Enrico Maletti)
(Le pagelle in dialetto Parmigiano sono lette da Enrico Maletti)
(Pramzàn dal sas)

(Si ringrazia lo "Studio foto Carra" di Parma per aver concesso la pubblicazione della foto del pubblico allo stadio Tardini.)


Nessun commento: