Il Pagéli di Crozè in djalètt Pramzàn testo pubblicato sulla Gazzetta di Parma del 25 agosto 2009

Da “Parmaindialetto” Bón’na fortón’na a tutt i Crozè p’r un bón campjonät äd sèria A 2009/2010








Alberto Paloschi e Jonathan Bibiany, i pu bón di Crozè in camp p’r Udinéz Pärma

(Testo solo in dialetto Parmigiano)
(Il pagéli di Crozè in djalètt Pramzàn)

Udinéz Pärma 2-2

Mirante séz : un pär äd parädi da razón, però nani tira via al vinavil d’insìmma a la riga ädla porta parchè a ’t zì pròprja incolè. Che lavór mäj n’usìda che vùnna

Dellafiore sèt : praticamént a l’ezòrdi sénsa infàmja e sénsa lòda, ma a ’s merita un vót in pù pròprja parchè butè in-t-al Colosseo tut d’ un pìc’

Paci sèt : zugär atàca a Panucci l’é un bél zugär ah lòmo ? Avanti acsì !

Lucaréli séz : tirämma via al picén che äd Lucaréli a’gh n’é restè che vón, e col giùsst, al vót l’é la médja tra al rigor provochè e al gol sgnè, a tutt il manéri la solita sicurèssa.

Panucci sèt : regìssta parfét, parsonalitè spasjäla, mi par chilù a stravèd da un bel po’, in pù da cuand l’ha tacagnè con Lippi ancòrra äd pù !

Morón séz : al solit capitàn, corsa grénta e vlontè da déz, precizjón un po’ meno, ma al solit gran cór

Mariga sìncov : un vót tajè a metè in-t- un secónd ! L’éra déz fin’ a l’ultom, ma sul parèg’ a né ’s pól mìga fär ‘na stupidäda compàgna no no e no !

Galloppa sìncov : un po’ tròp gornè, vè biondén fóra il………al caràtor, capì ? Dai bocär balón e avarsäri a cminsär da domenica ch’ vén

Länsafàm sèt : séns’ ätor la pù béla partìda da cuand l’é rivè, no parchè mi a j’ ò zughè con un Länsafàm in-t-i amatór che fin’a jerdlà a’l paräva pù bón che chilù

Paloschi òt : al putén l’à arcminsè d’ in do l’äva fnì, gol e corsa a rampär su par la ramäda ! Cme dir tutt parfét !

Biabiany òt : al né tira in porta gnanca sa ’t gh’é stè drè col s’ciòpp, però l’ha fat ‘na partìda strepitóza, a gh’ vól béle fat al taljànd a chilù parchè l’à córs pù lù che tutt ch’j ätor mìs insèmma

Guidolin sèt : bravo Don, bravo parchè a gh’éra n’aria bàsa in chi gióron chi, un narvóz ch’ a ’s tajäva col cortél, invéci con ‘na rivolusjón l’à mìs in camp ‘na scuädra cuäzi parféta ! Bravo Don, gran fiducia da pärta äd tutt

Téssra dal tifóz : sibén ch’ a gh’ sia parèccia génta che chisà al parchè la tira la voläda a sta téssra, anca insìmma ai giornäl, mi a digh che n’asurdìtè compagna l’éra difìccil immaginärla, próvi mó a cminsär andär a därla in via Palermo la téssra äd l’órdin pùbblich, ätor che al stadio !
(Tgnèmmos vìsst)
Testi di Crociato 63


supervisione ortografica
di Enrico Maletti