Il Pagéli di Crozè in djalètt Pramzàn, testo pubblicato sulla "Gazzetta di Parma" del 23 febbraio 2010

(Testo solo in dialetto Parmigiano)

Cagliari Pärma 2-0

Mirànt séz : sté gir sénsa colpa, dzämma che con la diféza d’ j ultom témp a ’t si n’eroe a presentärot in camp ätor che

Zenón zéro : Dino intrégh, piantè cme un gruggn, indormintè cme mi che però a son a lét con l’influénsa e tutt al rést, miga a fär al titolär in serie A ! Al fantazma dal prìmm Dino !

Zacärd zéro : a Pärma nojätor dzèmma fóra cme un balcon ! Second mi dato ch’ a né ’t vén miga da trop lontan a t’ al dovrìss capir subìt co vol dir

Paci zéro : s’ a gh’ fuss stè ancòrra al mond al pòvor Jimmy Feräri al t’ arìs tot su e portè con lu in tournè, parchè jerdlà a ’t sér compagn a ‘na marjonètta, ò réz l’idea ?

Lucaréli zéro : completämma al repärt, sul second gol tant che col là l’insucäva la bala ti a ’t sér ancòrra al TankaVillage

Castlén zéro : ätor casél äd l’autosträda avärt in sband, a né gh’ paräva gnànca vera a chilór dal Cagliari tutta ch’la libartè, e difati a s’é vìsst al risultät ! Pavlén, arpicläros ala zvelténna che ormäj al fond al sé vädda bél ciär

Lunardén zéro : alzér cme ‘na piùmma, sénsa fantazja un gran bräv ragas mo cme j’ho béle ditt al pära Titti butè in-t-la gàbia di león

Morón zéro : capitàn al so ch’ a né ’t dormi miga äd nòta in ch’ la situasjón chi mo nojätor second ti co podämma pensär ? Co é drè sucèdor ???

Valiàn sèt : la nota pozitiva äd la giornäda, corsa luciditè prezénsa fizica e vója äd saltär fóra da col baratro chi sénsa fond !

Biabiany zéro : fum fum fum e ancòrra fum, gran tòch d’arost s’al taca a ralentär anca chilù a sämma a post dabón

Crespo déz : e mama mia che emosjón fär la pagéla a Hernan, certo ch’ a l’äva immaginäda diversa, mo par ti Hernan, un déz par tutt, sénsa stär li a spiegär ancòrra, parsón’na d’ätor témp in col calcio malè !

Bentornè a cà tovvà in méza a la tò génta Pramzàn !

Guidolin zéro : béle ch’ a stagh mäl da mì con col virus ch’a gh’ò adòss, po’ fär la pagéla al Don in ch’la situasjón chi l’é ‘na tortura, un suplìssi ! Don co gh’é ?? S’é spachè la bici p’r andär a Barbjàn ? dai che ormäj a n’é ora

Boys déz : pensì un po’ che chi ragas chi cuand a vénna fóra il pagéli i saran apén’na tornè a cà, par väddor col spetàcol li, e in- t-un méz j’àn fat anca Catania e Palèrom con zéro pont e partìdi penozi! E la dignitè äd dir no grasja ai zugadór ch’ a vräva tirär il majätti ! Zò al capél davanti a tutt chilor vón in particolär che dòpa vintón méz d’inguistìssja l’é podù tornär in curva ! FINO ALL’ULTIMO CROCIATO ! AVANTI NON MOLLIAMO!

(Tgnèmmos vìsst)

(Pramzàn dal sas)

(Testi di Crociato 63)

(Correzione ortografica a cura di Enrico Maletti)