Il Pagéli di Crozè in djalètt Pramzàn, testo pubblicato sulla "Gazzetta di Parma" del 22 febbraio 2011

(Testo solo in dialetto Parmigiano)

Pärma Cesena 2-2

Mirànt zéro : a partir dala màja, che sinceramént la né ’s podäva miga väddor a fnìr con la gàta, fjòla ädla pòca trancuilitè ädla scuädra, ädla Socetè e ch’ a né ’s véna miga a tirär a màn l’ambiént par piazér

Valiàn du: tarsén l’é la novitè ädla giornäda, mo a vèddor cme al s’é fat saltär socuant volti da zugadór tutt ätor che fenòmon, l’é méj ch’ a né ’s ripeta miga ch’ l’esperimént chi

Lucaréli du : n’ätor ch’ al patìssa la presjón, mo mi digh, génta ch’ l’à zughè in ambjént ben pu cäld che còsste chi, che presjón gh’ ala da sintìr ? A tutt il manéri al balón al bruzäva in-t-i pè e i zbali j én stè parècc’ e pericolóz

Palètta du : da un méz a sta pärta a né ’s capìssa miga ch’ o gh’ sia sucés ! E si che la saudade a j’argentén la ’n dovrìss miga gnìr, mo l’é dvintè pauróz e narvóz anca lu

Paci du : insòmma Bogdani al pär al balón d’òr soltant cuand al zuga cont’r al Pärma, a vrìss savér al parchè narvóz, in ritärdi, imprecìz, Massimo vrämma voltär pagina che al lìbbor l’é drè a fnìr

Modést cuàtor : du vót in pu parchè l’é stè al pu dinamich ädla scuädra, mo da chi a dir ch’ l’à fat ‘na partìda decenta a gh’ n’in pàsa, e pò tant cross in curva da dedicär a chi a ’s lamintäva äd Castlén, cioè dal bròd gràs

Dzemaili zéro : sarò mi ch’ a gh’ vèd pòch ( miga véra ) mo col ragas chi a né gh’ la cäv miga a capir co l ’s faga su, sl’é un medìan ‘na mez’äla o còza !

Candreva zéro : e còsste chi l’é so fradél, né cärna né pèss, certo che aver’ghnì dù in-t-na scuädra ch’la s’à da salvär j én un pò tròp

Morón zéro : ch’ la bala persa sul second gol ch’ la frizäva in-t-i pè l’é al spéc’ äd ch’ l’an’ chi, äd ch’ la scuädra chi, äd ch’ la socetè chi, a gh’é da sperär äd stär in-t-i prìmm dan e cavärgla a saltärogh fóra p’r i cavjj

Giovinco cuàtor : ‘na punisjón e un cròs ! Stop ! Tròp pòch par chi gh’ dovrìss aver ‘na fàma da lòvv

Amauri cuàtor : al rigor ( pù che ätor grasja a còl nador dal Cesena ) e basta, ansi spès e vlontéra di movimént fóra témp e fóra da ‘na logica äd schema ( anca se parlär äd schema in ch’ la scädra chi l’é ‘na parola gròsa bombén )

Hernan séz : al rigor e la solita grénta, mo jerdlà njént äd pu, Hernan anca se rispét al rést ädla banda sémpor do spani sóra

Palladén sèt : al mérit d’aver tgnù avärta la valvola ädla bombola d’osigeno, e sperämma ch’ la né fnìssa miga sionò second mi il scortì j’én fnìdi

Marino zéro : Mìsster, a ’n so pù có dir, mò gnanca l’an’ ch’ a sämma retrocés a j ò vìsst acsì poch, dirìs cuäzi njénta !
(Pramzàn dal sas)

(Tgnèmmos vìsst)

(Testo di Crociato 63)

(Correzione ortografica a cura di Enrico Maletti)