Realizzato da Pietro Maletti
(Testo in dialetto parmigiano)
Pärma Lasjo 3-1
Mirànt òt : majonsén da sìra bél zgargjan color pojén, la solita sfiga ch’ la gh’ vèdda benìssim, mo stavolta concentrasjón al masim da pärta tòvva e ‘d tùtta la diféza
Zacärd òt : sät ch’ j ò vìsst al tò sozia Miclón prìmma ädla partìda, la petnadura l’é sémpor còlla lì mo a lu a gh’é nvè in tésta, dónca o té t’ fè la ténta bianca tì o sionò al fa il mèches ( se scrìvva acsì ? ) lu ; par la partìda cuand a t’ si acsì atént, a t’ gh’è pòch da imparär
Lucaréli nóv : andär in camp un pò mälmìss stricär i dént e zugär ‘na gran pardìta listés sénsa lasär gnana il brìzi a ch’ j ätor, la sa äd zugh dal balón da chi indrè ; e a m’ piäz pénsär che la sostitusjón la gh’ avìss al savór äd ‘na “standing ovation”, tùtta meritäda p’r un ragas serìssim
Palètta nóv : té t’ si montè la tésta dopa al gran gol äd Cesena e t’è provè un tir al vól äd sinìsstor che gnan GigiRiva a gh’ l’ariss caväda, però ala fén l’é stè un assist parfét par Floccari, elóra la va bén acsì sénsa fär trop i difìccil catèmma su tutt còl ch’ a pasa con cla crizi chi
Gobbi sèt : un pär äd diagonäli con salvatàg’ meraviljóz, però sul gol ciapè, a pärta la sfiga totäla, l’é anca véra ch’ a né t’ si mìga Belèn ch’ a t’ gh’è da fär väddor i “ciapètt” a còll ch’ a t’ gh’è davanti, un difensór al né s gira mäj !!!
Biabiany òt : sul prìmm subìt la paräva la solita bujja ch’ a t’ fè con la bala, invéci l’é stè un colpètt äd tàch genjäl, che praticamént l’à miss al pilolón a porta vóda ! E pò ‘na gran partìda äd sacrifìssi, ch’ a m’ fa sémpor pu crèddor che ti a t’ si un tarsén, un bonìssim tarsén
Valdes òt : finalmént la batècca dal diretor d’orchéstra in man e ‘na béla parsonalitè ! Un consilli s’ a pòs, còrra ancòrra un po meno, che tant li in méza sa gh’é ‘na còza ch’ a ’n manca mìga l’é la corsa, e rispärmia la luciditè par tirär fóra dil zugädi äd cualitè, che invéci i s mancon cme i sold in sacòsa dòpa ch’ a s’é fat al pjén ala machina
Mariga òt : tra un tirón äd gamba e ch’ l’ätor al témp äd fär un gol ch’ al väla platino mìga òr ! E du bindél al post di pè a fär äd la lèggna fóra stagjón, dato che la n’é miga städa fàta st’ invèron, par via äd dovér mìga sperär cme i mälvestì
Morón sèt : n’ätor che cuand a s’ pärla äd lèggna al n’é s’ fa miga pregär e difàti l’éra còll ch’ a sarvìva e al compit l’é stè fat ala perfesjón sénsa cme al solit tant ghirigori
Galòpa òt : vè Rito, da Romàn gh’ ät par cäz cuel äd parsonäl con la Lasjo ? Parchè a t’ gh’ äv ‘na vója, ‘na convinsjón, n’eletricitè adòs che mìga sémpor a tè gh’ l’è
Giovinco nóv : l’é manchè al gol, mo dil zugädi da gran zugadór, la fòrsa äd fär tirär al fjè a la scuädra cuand a sarvìva e ‘na continuitè che mìga sémpor a té gh’ l’è ! Pin in tribuna äd sicur l’à scrìtt un bél vot, important dato che adésa anca p’r i zugadór in odór äd Nasjonäla l’é in ariv la pagéla deciziva
Floccari déz : ‘na volta tant che al gol äd l’ex al fämma nojätor che ‘d solit al ciapèmma regolarmént, ansi stavolta du, a s’ sèmma arfàt con ilj intarés ! Certo che sa t’ aviss zughè tùtta la carjéra acsì, la maja da centravanti ädla Nasjonäla a t’ l’arìss mìssa su parècci volti
Donadón òt : bravo Mìssterr, ormäj al fond dal baril l’éra li ch’al sé vdäva benìssim, mo n’é mìga manchè la luciditè p’r imbrocär tùtti il mòsi decizìvi e a dirla tùtta jerdlà sira, anca cla còza che trop dé spèss la s’äva dè al vjolón ultmamént, cla dote importantìssima ch’ la piazäva tant anca a Napoleón, e che al so Méstor, l’Arrighe l’é famóz parchè a gh’ n’à parèccia; in djalèt t a s’ dirìss c*l mo a ‘n so miga sé insìmma al giornàl a s’ pól tirär via al starìssch (asterisco)
Curva Nord Matteo Bagnaresi : in-t-al ricord dal Bagna, i Boys i regalon sémpor al spetacol pu bél e comovént äd tùtta la stagjón, ‘na curva ch’ fa maravìja p’r un ragas, ch’ la n’é miga la solita retòrica, al viva in-t-la sò curva e in-t-al ricord di sò amigh e tutt cuant !
Nessun commento:
Posta un commento