"Il Pagéli di Crozè in djalètt Pramzàn". Pagelle stagionali campionato di calcio 2011 / 2012. Testo pubblicato sulla Gazzetta di Parma del 16 maggio 2012.

PAGÉLI STAGJONÄLI CAMPJONÄT 2011 /2012

Mirànt sèt : tra tozädi e majètti originäli t’é dè cuäzi pu spetacol fóra che in camp, pò da cuand a t’é cminsè  a deviär la bala da ‘na pärta a t’ si dvintè insuperabil ! Di vè a ‘n srà mìga gnu al mé amigh Andrea a därot socuànt ripetisjón ah ?

Pavarén déz : fondamentäl ! Figura äd riferimént par tutt anca cuand al né zuga miga, profesionìssta ezemplär, cuand al monta su l’é sémpor ‘na sicurèssa ! E dato ch’ a m’ pjäz zugär a där un cuälch consìlli äd marchè, Pavarén l’é confermè  anca con la rìmma !

Brandao séz : mìss in naftalina dopa l’andäda con l’Inter, sperèmma ch’ al n’ abia mìga fat il camoli e ch’al posa gnir bón in-t-na cuälca manéra        

Feltscher séz : vón con ‘na ciòmma acsì al ciaprà sémpor socuànt vót in pu, anca se second mi còll ragas chi l’à zbaljè mestér, mìga parchè al né sia mìga bón ( a dir la vritè fin adésa l’à fat vèddor pòch pòch ) mo parchè con ch’ la prezénsa lì e balär cme ‘l bala, al farìss pu sucés in televizjón sicur

Ferrario séz : ch’ il do o trèj partìdi ch’ l’ à zughè al n’ à gnanca figurè mäl, mo da cuand al Mìsster l’à provè Zacärd cme tèrs centräl bón’na not sonadór !

Gobbi òt : gran stagjón, sia con Colomba che con Donadón, basta färogh fär al tarsén e còll ragas chi l’é ancòrra un sjór zugadór, j al sävon tutt fóra che al raprezentant äd champagne ! Ätor consìlli, confermärol sens’ ätor

Jonathan déz : l’é städa ‘na mé scomìssa fin dala prìmma partida, oviamént a són contentìssim d’averla vénsa ala granda ! Sperèmma ch’ al né torna mìga a l’Inter sùbbit, anca parchè lu al restarìss vlontéra a Pärma, e l’é un tarsén cme a gh’ n’é pochìssim in gir

Lucaréli déz : al capitan äd la sèrja äd vitori pu longa ädla storja dal Pärma, a t’ si in-t-la storja anca ti ! A s’ vèdda che la clasjón con Pavlén l’ à porta bén dabón, st’ an’ ch’ vén a t’ gh’è da portär tùtta la scuädra acsì a s’ vénsa al campionät.

Palètta déz :  e cuand i zméj j én dvintè tri, a gh’ n’é pu stè par nisón, j ultmi cuìnndoz partidi al pu bón centräl dal campjonät, e anca socuànt gol da centravanti zmalisjè, Shinging l’é artornè, e sperèmma ch’ al né vaga mìga via trop ala zvèlta

Santacróza séz : un pò cme Brandao anca sa t’é zughè un pò äd pu, e si che second mi un cuälch nùmmor a té gh’ l’è, a tutt il manéri mäj ‘na parola zò äd post mäj ‘na polémica e l’é béle cuél

Zacärd déz : al solit, gran zugadór, tarsén prìmma, centräl dòpa, par chi n’ in capìssa äd balón l’é un piazér väddrot zugär e cme  són ‘drè ripétor da sémpor, sta mìga  andär a sarcär dal frèdd p’r al lét e fnìssa la carjéra a Pärma

Galòpa sèt : comuncue anca par ti un finäl da märcia trionfäla, condisjón fizica finalmént apost, la maruga la n’é mäj mancäda, second mi a t’ pól ésor un grand acuìsst a zéro evro par st’ an’ ch’ vén !

Marìga sèt :  l’é stè un pchè ch’a té t’ si fat mäl parchè in còll finäl chi, zontär anca la tò forsa a ch’ la scuädra strepitóza chi a gh’ sarìss stè da divartìros ancòrra äd pu e a tutt il manéri in bòcca al lòvv p’r al tò znòc’

Marques déz : Nando, ‘na partìda da titolär e un gol, ‘na médja da Mèssi o  Cristiano Ronaldo, epur a pär che con Pärma sia scatäda la sméla magica, parchè i t’ vólon tutt bén, e chissà mäj che con n’alenadór ch’ al càta la pozisjón e anca il paroli giussti par tutt st’ an’ ch’ vén a né gh’ pòsa ésor n’ ätra sorpréza eh ?

Modést séz : un pär ‘d gol important a l’inìssi, mo col schema äd Donadón fòrsi a t’ si stè al pu penalizè äd tutt, tutt somè però in-t-al complés cuäzi sémpor a l’altèssa

Morón séz : capitàn anca cuand è stè al momént äd fär un pas indrè e stär in panca un pò pu dal solit, a fär grupp e a där luciditè a tutt cuant ! Cme sémpor un ezémpi äd serietè e impìggn in tutt i momént

Musacci séz : ‘na cuälca discréta partida, mo da cuand Donadón l’à catè al pòst a Valdès, purtrop par ti a gh’é stè meno pòst, mo a Siena pront e lùccid a fär la tò pärtida listés, un jolly äd centorcamp utilìssim

Danilo Pereira séz : al vól dacuè e lasè al sól, parchè l’é mälmadur bombén, magàra da mandär in gir a zugär un pò, parchè sarìss un pchè därol via e pò vèddor dòpa un pò ch’ l’é bón !

Valdes déz :  có vól dir incrozär còll ch’ a t’ cata la pozisjón parféta in camp eh Calimero ? Pirlo l’é stè fortunè ch’ l’ à catè Ancelotti bonóra, purtrop par ti Donadón a t’ l’é incrozè un po’ tärdi mo l’éra un pò ch’ a ’n sé vdäva mìga un Toscanén acsì in méza al camp t’ al garantìss mi ! Da riscatär sènsa se e sénsa ma

Valian sèt : al solit coridór generóz e ùttil cuand a gh’é da mèttor äd la grénta in camp, e dato che Galòpa e Valdèz i gh’ àn mìss la maruga, al mix l’é stè esploziv ! Ala fén in-t-al scambi col Bològgna a gh’ èmma guadagnè ätor che nojätor

Biabiany òt : pjan pjanén é ‘drè  saltär fóra un zugadór ecesjonäl, mäj basta ch’ sia, cme dìz al Mìsster dil vòlti a t’ vén vója äd därogh di puggn in-t-la tésta mo al gh’ à di nùmmor e ‘na corsa mìga indifarénta, elóra sarìss un pchè ch’ l’artornìss via sùbbit

Palladén séz : chi l’ à vìsst ? Mi a m’ l’arcord pròprja poch, a fagh pròprja fadìga  tirär fóra cuél

Floccari òt : da vèddor l’é pròprja un pjazér, elegant cme un balarén, tecnicamént d’ ält livél, purtop al né sìggna mìga sémpor col ritmo giusst, sionò al sarìss in-t-na scuädra da “prìmma fasa” anca se adésa cme ‘désa anca al Pärma l’é äd primìssima fasa, ätor che

Giovinco déz : in-t-na parola, spetacolär ! Al prìmm an’ sénsa infortùnni, l’à fat vèddor ch’ l’é pròprja un grand zugadór, nasjonäl fìss e talént purìssim, epur socuànt “adètt ai lavór” i contìnnvon a dir ch’ al n’é mìga un zugadór da top club ! E va bén lòmmo sèt có s’ pól fär ? A t’ résti chi che al tò top club a t’ l’é béle catè ? Ti có dit ???

Pellè séz : pròprja parchè dòpa n’ anäda acsì a ’n vój mìga där un brutt vót a nisón mo cära al mé ragas, a t’ gh’é da mèttor un pò i dìd in-t-al tri-e-otànta, sionò a t’ pól andär a “ballando sotto le stelle” diretamént

Okaka sèt : epur, epur Eddy al gh à cuél äd bón, alenè da razón sénsa infortùnni, mi al provarìss ancòrra, scometèmma ?

Colomba séz : Mìsster gràsja ancòrra par l’an’ pasè, mo st’ an’ a pärta n’ecelénta preparasjón atlética, p’r al rést l’ à fat vèddor trop pòch, e dòpa a s’é vìsst che insòmma, la cualitè in-t-al grupp par fär bén l’ à gh’éra, a tutt il manéri in bòcca al lòvv p’r al futur

Donadón déz : al Mìsster di record, äd la serietè, l’elegansa, la competénsa,  l’inteligénsa, di record; a podrìss andär avanti acsì par dilj óri, mo a lu a gh’ pjäz pu i fat che il paroli, e sperèmma äd podér veramént scrìvvor ancòrra dil béli pagini insèmma parchè a Pärma con ‘na Socetè che finalmént l’ à catè la sträda giùssta, a s’ pól ancòrra scrìvvor tanti béli pagini, e lu l’é un scritór äd gran clàsa ! Gràsja äd tutt mo dabón ! GRAZIE CROCIATI
(Tgnèmmos vìsst)

(Arvèddros a st' an' ch' vén)

(Testo di Crociato 63)

(Correzione ortografica a cura di Enrico Maletti)