Al sìnndich Pisaròt al scrìvva ‘na lìttra avèrta ala citè. “A s’ dispjäz parchè a ‘n gh’ l’èmma mìga caväda a fermär l’inceneritór. J’ò fat al posìbbil con il fòrsi d’un sìnndich. Adésa guardèmma avanti”.

(La foto di Pizzarotti è di Cristina Cabassa)

 

(Testo solo in dialetto parmigiano)

Incó a Pärma sèmma ‘drè vivor un momént particolär ädla nostra citè. N’evént che tùtti il fòrsi ädla polìttica, meno che vùnna, j àn fortemént sostgnù, e ala fén, dòpa un parcórs  durè cuäzi déz ani,  i gh’ l’àn caväda a otgnìr. Sèmma ‘drè parlär äd l’acensjón äd l’inceneritór d’Ogsól, l'otäv in Emìlja Romagna, ch’l’à comincè a funsjonär a pòch chilometri dal céntor stòrich. Se incó a són chì par comunicär n’evént äd clà portäda chì, l’é parchè par parècc’ ani a Pärma è stè combatù ‘na batàlja polìttica e ètica ch’la zmòs il cosiénsi äd parècc’ –chi pro e cóntra- ch’l’à fat nàsor ‘na discusjón che da livél locäl, l’à fnì par dvintär d’importansa nasjonäla. Còsste chi, in ristrètt, dal 2006 a incó l’à significhè l’inceneritór d’Ogsól. E nojätor cme Movimént 5 stéli a ‘n sèmma mìga tirè indrè ala discusjón, ansi a sèmma stè pärta consapévol. E ala fén ädla corsa émma avù ragjón. Mo al témp listés registrèmma ‘na grand deluzjón. Èmma avù ragjón parchè incó, l’Emìlja Romagna dòpa avér pjè 8 inceneritór in-t-al cór ädla Pianura Padana la sé dìtta pronta a invertìr la sträda e andär adrè al parcors ambientalìssta tracè da l’Europa, méj tärdi che mäj, a vén da dìr. Mo sèmma  dispjazù parchè lìinceneritór a Pärma a ‘n sèmma mìga stè bón ‘d fermärol. A s’ pól dir còll ch’ a s’ vól, parchè in democrasja l’é lìbbor al camp p’r ogni opinjón polìttica: mo in campagna eletoräla a s’ sèmma dichiarè conträri –e còsste l’é giùsst dirol- e j èmma promìss äd fär al posìbbil par rivär a un rizultät  ch’al s’ dìssa sodisfasjón. Par còll ch’ a m’ riguärda, l’onestè in-t-la batàlja polìttica ch’j ò portè avanti, convìnt d’avér impgnè tùtti ilj energjj posìbbili –ch’j én compagni a còlli ch’a dróv p’r ogni asjón polìttica ch’ a fagh- im pòrton incó a parlärni a fàcia avèrta, sénsa nisón probléma e con tùtta l’onestè inteletuäla. J’ò fat tutt còll ch’ l’éra posìbbil fär con il fòrsi d’ un sìnndich. Cme aministrasjón èmma portè ala luza un parcórs äd costrusjón äd l’inceneritór a tràt pòch cér e par sèrt aspét pòch cér bombén, èmma s’ciarì dìll cuestjón che un dmàn j andràn in man ala Magistratura, sémpor sé a ‘n l’à mìga zamo fat. Cme Aministrasjón äd Pärma émma lavorè con serietè, èmma dmandè e pretéz al rispét integräl äd còlli ch’j éron il normatìvi äd légia. Adésa guardèmma avanti, parchè al declén äd ch’il strutùri chì l’é béle comincè, e l’é comincè pròprja in-t-l’an’ che il fòrsi polìttichi ch’ì l’àn volsù, céntor-sinìsstra e céntor-déstra i festèggion l’apertùra, cme s’l’a fùss ‘na nostra sconfìtta e mìga sòvva. Ezultànd in-t-al so intarés e dimenticànd, e sénsa vargòggna, d’avér neghè un referendum su l’inceneritór, richiést da ‘na bón’na pärta ädla citè. Incó al dibàtich polìttich su l’inceneritór al gh’à bìzzogna äd zvilupäros e piantärla lì äd stagnär su còll ch’ l’é stè dìtt in campagna eletoräla. Purtròp partì e movimént cìvvich j én restè con al pensér a magg’ dal 2012, invéci incó gh’é bizòggna äd guardär al futur: parchè pur importànt ch’ l’à sia la lòta, l’a ‘n n’è mìga l’ùnnich pónt dal nòstor programa.  Su l’Ambjént po’ a ‘n tornarèmma mìga indrè e a ‘n cambiarèmma gnanca pozisjón: è aumentè la racòlta diferensjäda in céntor stòrich, l’é aumentäda a livél generäl su tutt al teritòri dal Cmón äd Pärma, e continuarà a aumentär, e par còsst a zbasarèmma i còsst dirét p’r i citadén, còjj, p’r inténdros dìll bolètti. Parlarèmma con Iren par rivär a solusjón condivìzi, äd benefìssi econòmich e ambjentäli par la citè. Sèmma al lavór p’r un nóv pjan ‘d viabilitè urbana, mäj discùss in-t-i ùlltom déz ani. Lavorèmma e continuarèmma a lavorär. A m’àuguri che äd l’inceneritór e dilj inceneritór in generäl a s’ n’in pòsa parlär ancòrra e fär la riflesjón su còll ch’ l’é  stè e su còll ch’ a srà la nostra polìttica. Informì su còjj ch’ al l’à volsù, su còjj ch’ j àn sarnì äd spéndor pu äd 200 miljón par la sò costrusjón, su còjj ch’al l’à portarà a ésor un mirén dal rùd dilj ätri Provìnci Emiljani; su còjj che iér i s’ fregävon il man par la sò costrusjón e incò i gh’ dan äd näz. E po’ su còjj ch’i l’àn contrastè e chi à provè a fermärol, con ilj ärmi äd la légia e con al pensér rivolt vèrs al futùr.

Fedrìgh Pisarót
Sinndich äd Parma
(Il testo in italiano è pubblicato sulla "Gazzetta di Parma" del 29 agosto 2013. Il testo in dialetto parmigiano è tradotto da Enrico Maletti).